النهار الوطني للمجتمع لمزوفر والباير

آخر تحديث : الخميس 19 مارس 2015 - 10:23 مساءً

صافي تهنيتي؟! ما رتاحيتي حتى جبتيها فراسك؟

الضاوية نوضت الروينة فالمسيرة، واش داك ترفعي شعار باغية راجل؟!

واش داك للعراس يا منتوفت الراس؟!

المناضلة الضاوية حتى واحد ما عارف واشتا يدور في راسها من غير اللي خلقها. فاعلة جمعوية من الطراز الرفيع يعني جمعوية فاعلة تاركة هاذ ليامات راهي دايرة الجمرة قالك دارو اليوم الوطني للمجتمع المدني و ماعيطولهاش. داخلنا عليكم بالله واش هاذ العامل عندو لعقل ولا مايكسابوش، عرض على شي بعضين ونسا الضاوية، راه المجتمع المدني بلا الضاوية مايسوا حتى زفتة. انا اللي مابغاش يتفهملي واش هاذ المجتمع المدني خدام ولا غي لافيشة بحال داك المثل ديال لافيشة واعرة والفيلم محروگ. واش كاين شي مجتمع مدني ديال بصح ولا غي الجمعيات ديال المسيرات الداحشية والجاحشية (ماشي ديال العراق و سوريا الله يرحم الوالدين باش ماتفهمونيش غلاط). على هاذ لحساب راه ماكان غي المرقة والورقة فهاذ المجتمع المدني مين نايضة گاع هاذ شقلالة على اللي ماعرضهمش العامل، يا ودي الله يخرجنا بدار العيب بلا عيب.

الضاوية ماتصرطتلهاش عدم توجيه الدعوة ليها مغانات مع العامل حتى هي باغية تدير يوم وطني،نتا دير يوم وطني وهي تدير نهار وطني ونشوفوها فين توصل نردو والديها كلها يوميات و نهارات. بنت العربي وتديرها ماكانش اللي يعرفها گدي. المهم الضاوية مامفاكاش معزة ولو طارت النهار الوطني للمجتمع لمزوفر والباير راه على الابواب معرضتش الضاوية وشوف شكون غادي يدخلك تحضر حتى نتا. الحاصول مع الضاوية الله يخرج سربيسنا على خير.

عمي بوجمعة

2015-03-19 2015-03-19
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *


شروط التعليق :

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

اكتب ملاحظة صغيرة عن التعليقات المنشورة على موقعك (يمكنك إخفاء هذه الملاحظة من إعدادات التعليقات)

عمي بوجمعة