كي الكورتاج كي الكورتيج الله يجيب غي الصحة والسلامة

آخر تحديث : الجمعة 10 أبريل 2015 - 10:08 مساءً

ها اللي قلنا الضاوية ماغادي ترتاح حتى تجيبها فراسها، واش داك للعراس يا منتوفت الراس. دايمن كنت نقول باللي نهار التالي هاذ المناضلة غادي تجيب الربحة ولا تجيب شي سطل يقرقب. قالك اسيدي المدام حتى هي ولاو يعرضو عليا للمؤتمرات و اللقاءات اللي فيها الغاشي. الروينة اللي نايضة هاذ ليامات واحد الطابلة مدورة على شي حاجة ديال الاجهاض ما الاجهاض، ماشي هذا هو المشكل.

المشكل الناس موجهين الدعوة للضاوية على اساس مناضلة ورئيسة جمعية قدها قداش، پشاااااخ يا لالمان الناس حسابلهم شكون هاذ الضمضمة اللي غادي تحضر وتشارك وتناقش وتحلل و زيد وزيد، المناضلة دايرة بحال شي قماقم راهم يضورو هاذ ليامات غي اللي كتب شي جوج حروف يولي شاعر و كاين اللي ولا صحافي بلا مانهضرو دوك اللي ايلا غي شاف فيه بوفتيلة يقولك انا معارض للنظام. المهم الناس عرضو على الضاوية وكبرو بها وعطاولها الكلمة باش تتكلم على الكورتيج، يا وذنيكم ماتسمع غي الخير، قالتلهم انا بنتي مين دارت الكورتيج تبعتها اكثر من ربعين لوطو يوصلوها و بنت خضرة جارتي شي ثلاثين لوطو الناس بقا شي يشوف فشي المسيرة مالقات ماتقول، يا معامن راكي مخيمة ياودي يا.

السؤال اللي طرحاتو المسيرة قالتلها: من وجهة النظر ديالك واش خاصنا نقننو الكورتيج؟

قالتلها لا انا ضد تقنين الكورتيج الوحدة ايلا مادارتش الكورتيج ماعندها قيمة خاص السيد اللي غادي يديها يعرف القيمة ديالها، الناس ماعرفو باش تبلاو واش هاذي راها تهدر بنيتها ولا راها تتريگل علينا؟؟

الشريفة واش راكي عارفة علامن راحنا نهدرو؟!

على الكورتيج اللي يتبع لعروسة ولا راني غالطة؟!

واااا الشريفة هاد الهيلالة كاملة راها ناضة على الاجهاض. ايوا لالة الضاوية درك واش عندك شي وجه غادي تدرگيه ولا كي ديما؟!

ولا عندك كي الكورتاج كي الكورتيج الله يجيب غي الصحة وخلاص؟!

عمي بوجمعة

2015-04-10 2015-04-10
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *


شروط التعليق :

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

اكتب ملاحظة صغيرة عن التعليقات المنشورة على موقعك (يمكنك إخفاء هذه الملاحظة من إعدادات التعليقات)

عمي بوجمعة