خمسة لصحتك

كلمتين في الضغط مع د. محمد جاد

كلمتين فى الضغط لمن يهمه الأمر ✋

▪️١- الضغط العالى مرض مزمن، بس مش نهاية الدنيا،يعنى هو قرص تاخده و تعيش حياتك.

▪️٢- الضغط مرض فيه نسبة وراثة و نظرياته كتير و دا الأصل فيه، بس(مش) معنى كده ان العيلة كلها هيجلها الضغط.

▪️٣- الضغط ممكن يكون له اسباب زى مشاكل الغدد او شرايين الكلى بس دى حالات نادرة.

▪️٤- طبيعة ضغط السيدات أقل من الرجالة يعنى ٩٠/٦٠ و ١٠٠/٦٠ دا طبيعى للسيدات.

▪️٥- الضغط بيتقاس مش بيتحس،بمعنى ان كتير من مرضى الضغط ضغطهم صامت، يعنى الضغط بيعلى من غير أى شكوى، لا صداع و لا زغللة فالعين و لا أى حاجه،و بالتالى الضغط عبارة عن رقم قبل ميبقى عرض أو شكوى.

▪️٦- فى 💯سبب للصداع غير ارتفاع الضغط.

▪️٧- التدخين🚬🚬 بيعلى الضغط و الملح بيعلى الضغط و المخلل ملح على فكرة ✋. أما الكولستيرول العالى ممكن يكون له دور فإرتفاع الضغط ممكن!

▪️٨- الضغط الواطى بنسبه كبيرة عرض مش مرض.طبعا له اسباب كتير زى ضعف عضلة القلب و اضطراب بعض الهرمونات لكن اشهر سبب هو قلة شرب السوائل و أولها الميه

▪️٩- كل نزول كيلو فى وزنك بينزل الضغط درجة يعنى ممكن و (بدون مبالغة) يكون علاج الضغط هو انك تخس و دا حصل و شوفته فكتير من مرضى الضغط.

▪️١٠- الكركديه 🍷🍷مش علاج للضغط العالى سواء سخن أو ساقع، علاج الضغط أقراص، تسمى الله و تأخدها

▪️١١- السكر كمرض ملوش دعوة بالضغط لا من قريب و لا من بعيد

▪️١٢- الضغط العالى مع الوقت و بدون تظبيط بيأثر على الكلى، و مشاكل الكلى بترفع الضغط يعنى الأتنين سبب و نتيجة لبعض

▪️١٣- مرضى الغسيل الكلوى ربنا يعافيهم من أكتر الناس اللى ضغطها متقلب و دا من التغير فى كميات السحب على مكنة الغسيل. يعنى ممكن تلاقى مريض الغسيل ماشى على علاج للضغط العالى بعدها بسنة تلاقيه بياخد علاج يرفع الضغط. ساعتها دكتور الكلى بيدخل مع دكتور القلب فى تظبيط للضغط.

▪️١٤- كل سن و له ضغطه.(مفيش) حاجة اسمها ٨٠/١٢٠ الضغط المثالى،دى مقولة خرافية ملهاش أى مرجع طبى.

▪️١٥- مش كل تضخم فى عضلة القلب بيكون سببه الضغط العالى فى ١٠٠ سبب تانى لتضخم القلب و مش كل تضخم حاجة وحشة، يعنى فى تضخم حميد،حلو يعنى؟ اه فى.

▪️١٦- المسكنات الكتير و على مدار سنين بتعلى الضغط

▪️١٧- أى علاج بينزل الميه من الجسم(مدر للبول) بينزل الضغط فممكن علاج الضغط يبقى قرص الميه و دا اللى بيقرره الدكتور.

▪️١٨- قياس الضغط بيتأثر بالنفس قبل ما يتأثر بالأكل و التدخين و المجهود و الإنفعال،فمينفعش تبقى منفعل او لسه واكل و تروح تقيس الضغط، و ساعتها لو طلع عالى >>>>>>دا مسموش ضغط عالى

▪️١٩- تشخيص الضغط هى عمليه السهل الممتنع…. يعنى إيه؟ يعنى بشوف ناس كتير مينفعش نسميهم (مرضى) و ماشيين على قرص الضغط. طيب ليه؟ عشان الضغط اتقاس مرة طلع عالى.تشخيص الضغط يعتمد على عدد من القياسات سواء عند الدكتور أو فى البيت،متحكمش على الضغط من قياس مرة واحدة،دى مرحلة التشخيص اللى بعدها نقرر هناخد علاج الضغط و لا لأ.

▪️٢٠- الضغط بيتقاس من الدراع اليمين و الشمال عادى،و لو الفرق بين الدراعين ١٥ درجة أو أقل فدا عادى جداً.

▪️٢١- علاج الضغط بيبدأ تأثيرة يظهر ممكن بعد يومين. فمش هتاخد القرص بعدها ب ١٠ دقايق هتلاقى ضغطك ظبط. الصبر.

▪️٢٢- للصبر حدود، بمعنى!.لما اقولك هتحتاج تتحجز فى العناية عشان الضغط عالى،متستغربش، تعرف ساعتها ان الضغط العالى ده تسبب فى مضاعفات و ساعتها مينفعش تروح بيه البيت

▪️٢٣- أكل السكر و الحلويات (مش) بيوطى الضغط

▪️٢٤- بالنسبة للحوامل، ضغط الحمل ممكن ينتهى بأكتر من سيناريو ممكن ينتهى الضغط خالص و يرجع طبيعى بعد انتهاء الحمل،ممكن يبقى هو بداية علاج ضغط مزمن مدى الحياة. المهم وقت الحمل لازم السيطرة عليه بسرعه إن شاء الله عشان نتفادى تسمم الحمل.

▪️٢٥- بلاش حد يقرأ النشرة اللى مع العلاج فى العلبة،لأن ساعتها ممكن ضغطه يعلى أكتر✋، و دا بخصوص علاج الضغط او أى علاج تانى، لأن دى شغلة الدكتور.
…………………
دمتم بخير و فى أفضل حال 🌹

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى