١٠ مفاهيم خاطئة عن مرض السكر مع د. محمد جاد
📢 10 مفاهيم خاطئة عن مرض السكر ..
1- السكريات والحلويات فقط هي الي بترفع السكر.❎
النشويات زي الارز والخبز والمكرونة وجميع المعجنات المصنوعة من الدقيق الابيض خصوصا . . خطيرة جدا وبترفع السكر أيضا .. لأننا بنتناولها بكميات كبيرة وبتتحول في الجسم ل سكر.☑️
2- مريض السكر ممنوع تماما من السكريات والنشويات عموما .. ❎
مريض السكر بياكل كل حاجه لكن بحساب .. حتى أن بعض التوصيات العالمية لسه شايفين أن المفروض تبقى النشويات 50-60%من وجبة مريض السكر .. لكن بشرط تبقى نشويات جيدة☑️
(فيها تفصيل مش وقته).
3- مريض السكر لما يحس أنه جعان معنى كده أن ده هبوط سكر ولازم يأكل ..❎
ارتفاع السكر ونقص الأنسولين أو عدم كفائته بيخلوا المريض يحس بالجوع تمام زي الي عنده نقص سكر لأن الفكرة واحدة .. الخلية جعانه لان المسؤول عن دخول السكر داخلها وهو الأنسولين مش موجود .. لما تحس بأعراض هبوط أو جوع قيس السكر من فضلك.☑️
4- طالما المريض اتوصفله انسولين يبقى ده اخر المطاف ..❎
مش على العموم .. مرضى سكر النوع الأول بياخدوا انسولين من أول يوم .. وكتير بيمشوا عليه سنين بدون اي مضاعفات ..☑️
5- لو الدكتور وصف انسولين يبقى هكمل بيه طول عمري ..❎
احيانا بنوصف الأنسولين في بداية التشخيص مرحلة مؤقتة فقط .. أو وقت التعب .. ونرجع تاني بأدوية الفم ..☑️
6- الي بياخد انسولين ياكل براحته .. ❎
هتاكل كتير وزنك هيزيد .. مقاومة جسمك للانسولين هتزيد وهتحتاج جرعات اكبر علشان تظبط السكر وهيبقى صعب .. ده غير مشاكل السمنة ..☑️
7- الأنسولين المائي (الاكترابيد) والمخلوط (الميكستارد) ناخدهم وناكل فورا ..❎
من الأفضل الانتظار تلت ل نصف ساعه قبل الأكل .. اعرف من طبيبك نوع الأنسولين بتاعك ومحتاج تاخده قبل الأكل بوقت قد ايه .. ☑️
8- اطفال السكر من النوع الأول ممكن يوقفوا الأنسولين أو ياخدوا علاج دوائي بالفم لو نظموا اكلهم ..❎
الأنسولين هو العلاج الأوحد لمرضى سكر النوع الأول ولو طفل وقف انسولين ومحصلش حاجه يبقى مكانش نوع أول اصلا .. ☑️
9- وقت التعب نوقف الأنسولين لان الطفل أو المريض مبياكلش كويس ..❎
وقت التعب أحيانا بنحتاج جرعات اكبر من الأنسولين .. وايام المرض ليها تعامل خاص وحساس لكن ابدا منوقفش الأنسولين .. ☑️
10 – عنده سكر عصبي مش محتاج علاج ..❎
العصبية والحالة النفسية السيئة ممكن تعلي السكر فعلا. . لكن طالما السكر ارتفع فوق الأرقام الطبيعية يبقى انت مريض سكر ولازم تاخد علاج .. وتظبط أكلك .. ومتتعصبش ..
😍 دمتم بصحة ..
