رمضان البرنس اللى ملحقش يفرح

قصة نجم الاغنية الشعبية فى فترة التسعينات

بداية قوية وصعود سريع وحادث مفاجىء يقضى عليه وأسرته

من غنى إرجعى وبعدها عودي فكانت فى قلب كل شاب من أبناء هذا الجيل.

أسطورة الاغنية الشعبية وصاحب الكاست الثابت بجميع سيارات الميكروباص

توقع الكثيرين أنه سيكون خليفة محمد رشدي وأحمد عدوية وقد كان بالفعل إلا أنه رحل سريعا بعمر الخامسة والثلاثين.

خلال حقبة التسعينات من القرن الماضي كان لا يوجد صوت يعلو فوق صوت رمضان البرنس .. المطرب صاحب الصوت الحزين رائع الشجن، اللي باين انه جابها من تحت قوي .. اللي شرايطه موجودة في تابلوه كل ميكروباص والسواق عشان يبقى سواق لازم ياخد رخصة وشريط رمضان البرنس من كثرة شهرة وأهميتها خلال تلك الفترة .

والمطرب رمضان البرنس اسمه الحقيقي هو رمضان محمد شاكر، محل ميلاده في منطقة حلوان، لأسرة فقيرة جدا..

ومع اهله سافر لمحافظة الاسماعيلية وهو صغير ، محافظة الاسماعيلية تلك البلد الصغيرة اللي كل اهلها بيقدروا الفن وعشان كده كانت البيئة المناسبة لانطلاقة برنس الاغنية الشعبية رمضان البرنس.

مطرب ملامحه وحالته هى نفس ملامح الناس الغلابة اللي بتسمعه وكمان اسمه زيهم.

انت متخيل إن المطرب المفضل ليك يبقى اسمه رمضان.. دي ميزة للون اللي بيغنيه..
بدايته كانت بعد وفاة والده، هو كان ليه 3 اخوات هما “البرنس، وجمال، ومحمد”، اسم البرنس مش اسم شائع.

رمضان بقى إسم شهرته هو رمضان البرنس وبقى يتطلب بالاسم في معظم الافراح الشعبية يقدم فقرة أو اكتر يغني اغاني قديمة وكان دايما بيغنى لمحمد رشدي ومحمد العزبي وأحمد عدوية هو كان بيحب جدا محمد رشدي وشايفه مثله الاعلى اللى نفسه يكون زيه.

في بداية فترة التمانيات اتقدم رمضان البرنس لاداء أختبارات الاذاعة واعتمدوه مطرب شعبي، وبعدين قدم اول البوم ليه اسمه “عايزه إيه” كان واضح ان الالبوم مش مصروف عليه نهائى بمعنى أصح شريط تعبان وشركة من تحت بير السلم اللي عملته لرمضان البرنس، وعلى سبيل المثال هتلاقى على ظهر الشروط مكتوب “مع تحيات سيد بخيت” مش اسم الشركة لا اسم المُنتج نفسه، الالبوم ده كان بالتعاون مع الشاعر عبدالعزيز أمين مكتشف رمضان البرنس واللي دخل مفردات جديدة للاغاني الشعبي.. يعني مثلا .. اغنية عايزة ايه.. هي اغنية بتناديني تاني ليه اللي غناها طوب الارض لما نجحت بيها دينا مسعود..

في البوم عايزة ايه.. فيه اغنية اسمها يتيم الام دي شعشعت قوي في الشارع.. اصل سواقين الميكروباص في 3 مواضيع بيشغلوهم ومنغصين عليهم حياتهم.. غدر الصحاب والصاحب اللي مش وفي.. والموضوع التاني خيانة الحبيبة او الخيانة بشكل عام .. والموضوع التالت الام.. رمضان البرنس ادالهم في الالبوم دا ال 3 انواع عايز خيانة خد “عايزة إيه”.. عايز الام خد “يتيم الام”..

نجاح الالبوم وفقا للي اتصرف عليه خلى المنتجين يكملوا مع رمضان وعمل 12 البوم.. وفي سنة 1997 عمل البوم ذكرياتي .. وفيه اغنية ارجعي .. اللي صورها كليب وهو الكليب الوحيد ليه .. كلمات الاغنية كانت بتقول ايه بقى “ارجعي.. رجع الشتا يدق البيبان.. ارجعي .. رجع الربيع يكسي العيدان ارجعي.. ارجعي محتاج لكي .. ارجعي غلبت اشتكي.. ارجعي لو شفتي حالي هتدمعي”.. كلمات غريبة ع ودان اللي بيسمع شعبي..

وكانت فكرة الكليب ابسط من البساطة.. رمضان ببدلته الكاملة كرافتة وصديري وبليزر ونضارة سوداء صغيرة.. والموديل اللي شبه الفنانة صابرين بتشم في وردة طول الكليب.. وكانت بتبص للكاميرا بنظرة مخيفة مش مفهومة.. لكن الكليب نجح والاغنية نجحت جدا.. وكنت بحس بصدقه .. لما بيقولها “وانتي ليه مبترجعيش وانتي ليه مبتسمعيش”.

وكان بيعبر عن حالة شخصية للغاية وهو بيقولها “ما الناس حوالينا هي .. عايشين ايام هنية.. اشمعني بس احنا في هموم وعذاب نعيش”.. يمكن دي حالة شخصية اكتر من اغنية كتبها شاعر لمطرب..

ليه اغنية خفيفة اسمها ايوة آه.. الاغنية دي تسعة اعشار المياصة اللي في الدنيا موجودة في الكورال بتاعها.. وهما بيرددوا وراه.. اغنية خفيفة بس حلوة ومن اول اغاني السكسكة..

في التسعينات كان رمضان البرنس لقبه مطرب الميكروباصات واتهاجم بشدة.. بالمناسبة اي حاجة جديدة بتتهاجم عادي .. الناس بتخاف من التجديد . مش سهل تقنع الناس بفكرة جديدة.. بس هو عمل حالة كدا.. لحن كلاسيكي وكلمات بسيطة بس جديدة..

كان في فيديو شهير لأحمد عدوية، وعدد من الفنانين، بيحتفلوا بعيد ميلاد رمضان البرنس الاخير.. وغناله فيها يا بنت البلد والقمر مسافر وعدوية قال في الفيديو: “اعتذرت عن حفلين عشان احتفل بعيد ميلاد البرنس .. والله لو كانوا بمليون جنيه مش عاوزهم”، الفيديو دا اتمسح من اليوتيوب مش عارف ليه بس الناس رفعته تاني.

الحفل يخليك تحس ان رمضان البرنس بدأ يحط رجله على اول طريق الثراء والشهرة .. فنانين مشاهير في عيد ميلاده.. عيد ميلاد مكلف.. يعني خلاص ابن حلوان اللي اتولد فقير وعاش تلتين عمره فقير.. خلاص بقى حط رجله على اول الطريق..

شهرة متمثلة في اغنية عودي اللي كسرت الدنيا حرفيا.. عودي غنوة على عودي.. عودي لا معني لوجودي .. عودي دبل عودي .. كلمات تحس اللي كاتبها فيلسوف مش شاعر..

وفي فى 16 أبريل 1998، كان احمد حسن لاعب الاسماعيلي وقتها.. بيرقص مع البرنس في الاسماعيلية بمشاركة فريق الاسماعيلي كله .. ودا قاله محمد بركات في لقاء ليه بعد كدا.. لما قال عنه “البرنس كان يمثل حالة متفردة فى تسعينيات القرن الماضي، وإن كل الإسماعيلية كانت تعشق صوته وجميع أغنياته، خاصة موال (الصبر/ الأستاذ وتلميذه)”.

اهي أغنية الاستاذ والتلميذ دي كانت الاغنية الرسمية فعلا للميكروباصات.. فيها الخيانة والصاحب الجدع والندل اللي بيتنطط ع استاذه .. اغنية القصة اللي بيحبها المصريين.. والاغنية فعلا كسرت الدنيا.

كان بيجهز عشان يسجل أغنية ساعة الغروب.. من كلمات مسعد القص .. واللي اتكتبت مخصوص ليه.. لكن واضح انه حب يجرب ساعة الغروب مش بس يغنيها.. كان هو ومراته مدام عبير في عربيته مع اولاده رايحين راس البر فى محافظة (دمياط).. وكان الكلام ده تحديدا في شهر مايو سنة 1998.. عمل حادثة كبيرة بعد ايام قليلة من غناء احمد عدوية ليه أغنية “القمر مسافر”.. وفعلا القمر سافر.

مات فى الحادث رمضان البرنس ومراته وولاده محمد ( اللى سماه على اسم ابوه) وبنته سلمى .. في الحادث دا عند راس البر.. مات وهو فى سن ال 35 سنة.. مات رمضان البرنس اول ما بدأ يرتاح… وكأن الدنيا دي في ناس جاتها بس عشان تتعب.. نصيبهم من الراحة هياخدوه في مكان تاني.

في العربية كانت معاهم الخادمة بتاعتهم.. وهي الوحيدة اللي عاشت.. فطلعت اشاعة ان الخدامة هي اللي دبرت الحادث.. لكن بعد تحقيق طويل ثبت ان الخدامة ملهاش اي علاقة بالموضوع.

وصاحبه محمد السويسي بعدها غني اغنية “ساعة الغروب” وأهداها ليه بعد وفاته.. لكن تبقى مفارقة القدر ان عيد الميلاد الوحيد اللي اتعمل بزيطة وهليلة وكاميرة فيديو ليه.. كان عيد ميلاده الاخير.. وكإنه وداع يليق بـ “برنس”.. والذى رحل سريعا.