لعنه الفستان رقم 12
فى فيلم فيروز هانم فى مشهد من المشاهد هاتلبس فيه فيروز فستان سهره
فعمنا أنور وجدى يسكت لااااااا
اتفق مع مصمم أزياء شهير انه ينفذ فستان شيك اوى آخر ألاجه
وزهق الراجل فى عيشته كل مايصمم له فستان مايعجبهوش ويقوله عايز حاجه اشيك من كدا يعيد الراجل تصميم الفستان ويروحله يقوله لا عايز حاجه أحسن من كدا لحد ما فى الآخر عجبه واحد وقاله باااااس هو دا
الراجل بدأ فى التفيذ فراحله انور وجدى وقاله لا غير التصميم دا وغير فيه لحد مازهق الرجل فى الشغلانه
فضل يغير ويعدل لحد ماجه التصميم رقم 12وأخيرا عجب الحج انور وجدى
خلص عم المصمم الفستان بطلوع الروح ولبسته العسوله فيروز وصورت بيه اول مشهد على خير
وبعد ماخلصت المشهد راحت تقعد على كرسى تستنى لحد مايخلصو تظبيط اضاءه المشهد اللى بعده
وأول ماجت تقوم هوب الفستان شبك فى مسمار كان فى الكرسى وقطع الفستان هنا انور وجدى اتعصب ووشه جاب الوان وقال هاتولى المصمم بسرعه فبعتو جابو المصمم وقاله لازم تصلحه فورا وماتخليش الخياطه تبان
هنا المصمم كان شمتان ومابينش وقال لازم أزهقه فى عيشته زى ما زهقنى فى الشغلانه
رد عليه قاله للأسف الفستان مش هاينفع يتعالج لازم افصل واحد تانى غيره ودا هاياخد 3 أيام عالاقل
انور وجدى كان هايغمى عليه من الصدمه يعنى ايه يوقف تصوير 3 أيام وتعطيل التصوير دا هايكلفه كتير ماهو المنتج بتاع الفيلم
قاله معلش شوفلى حل سريع بنبره صوت مكسوره
لكن المصمم صمم على رأيه وقاله 3ايام يعنى 3أيام مافيش حل
ففيروز صعب عليها انور وجدى راحت للمصمم وقالتله معلش حاول تصلحه دلوقت فاستجاب لها وصلحه على طول ياسبحان الله
وفى المره التانيه
راحو يصورو مشهد بنفس الفستان مشهد فى القصر والراجل صاحب القصر كان موافق بالعافيه انهم يصورو فى قصره
وقالهم بشرط تنجزو بسرعه وتسلمونى القصر
فكان فى مشهد المفروض ان فيروز بتجرى داخل القصر وماخدتش بالها ان الجناينى راشش الممر ميه فاتزحلقت ووقعت والفستان بقى طينه واتقطع
هنا انور وجدى كان هايتشل الوقت بيجرى وصاحب القصر مستعجل على استلام قصره
فبعت للمصمم اللى من الواضح انه كان داعى على انور وجدى
جه المصمم وعالج الفستان وكملو المشهد على خير
هنا انور وجدى بيبص عالسيناريو لقى ان فيروز لسه هاتصور بالفستان دا 20 مشهد كمان
فبعت جاب المصمم الراجل اللى طهق والله وقاله يعمل لهم 3فساتين نفس الموديل دا بالظبط عشان يبقو احتياطى معاه ما الراجل اتقرص من اللى شافه
عشان لو حصل للفستان اى حاجه يبقى احنا كدا فى الأمان ومعانا بديل
وبالفعل المصمم نفذ ال 3 فساتين بس اللى يضحك بقى انهم ماحتاجوش ولا فستان من ال3 دول فى التصوير وكملت كل المشاهد بالفستان الأولانى
تقريبا كدا دا كان ذنب المصمم وهو الكسبان الوحيد فى الموضوع دا كله